Kunyonyoka Manyoya kwa Kuku

  1. Kunyonyoka manyoya kwa kuku ni nini?

Ni mchakato wa asili na muhimu kwa kuku kupoteza/kujinyonyoa manyoya ya zamani/yaliyochoka/yaliyovunjika ili kupata/kuota manyoya mapya.

 

  1. Kwa nini kuku wananyonyoka manyoya?

* Sababu kuu ni kuku kumaliza mzunguko wake wa utagaji.

* Sababu ndogo ndogo ni:

– Ukosefu wa chakula bora

– Ukosefu wa maji

– Joto kali sana

– Stress/ msongo wa kimwili, mfano majogoo kupanda jike moja mara nyingi

 

  1. Kuku hunyonyoka manyoya wakati gani?

* Vifaranga wanapototolewa wanakuwa wamefunikwa na vimanyoya kama hariri. Katika ukuaji wao hupitia kunyonyoka manyoya mara 4 mpaka wanapokuwa wakubwa, na hivyo kupata manyoya kamili. Vipindi hivyo ni wakiwa na umri wa wiki 1 – 6, wiki 7 – 9, wiki 12 – 13 na wiki 20 – 22.

* Kuku wakubwa wananyonyoka manyoya angalau mara moja kwa mwaka. Na itamchukua kuku muda wa miezi 2 – 4 kumaliza mchakato wa kunyonyoka manyoya hadi kuota.

 

  1. Mchakato wenyewe wa unyonyokaji manyoya.

Manyoya yanayoota huyasukuma manyoya ya zamani kwa nje na kudondoka. Kuku huanza kunyonyoka kuanzia kichwani, kwenye mabawa, mwilini hadi mkiani.

 

  1. Aina za unyonyokaji manyoya.

* Unyonyokaji mgumu: Ambapo kuku hunyonyoka manyoya haraka, na humchukua muda mrefu kuota manyoya mapya.

* Unyonyokaji laini: Ambapo kuku hunyonyoka manyoya huku manyoya mapya yakiota baada ya muda mfupi.

 

  1. Utegemee nini kipindi cha kuku kunyonyoka manyoya?

* Kuku hupunguza kutaga au kuacha kabisa. Hii hutokana na kwamba 80-85% ya manyoya ni protein na 13% ya mayai ni protein, hivyo kuku hufanya uchaguzi wa kuitumia protein anayokula kwenye chakula katika ukuaji wa manyoya mapya na kupunguza protein kwenye kutengeneza mayai.

* Manyoya mengi kunyonyoka.

* Kuku wanaweza kuonekana kama wanaumwa na kupungua uzito.

* Kuku wanaweza kuwa wakorofi na wakali.

* Kuku wengine kwenye banda wanaweza kumdonoa ngozi kuku anayeota manyoya na kusababisha kutoka damu.

 

  1. Nini cha kufanya kuku wanaponyonyoka manyoya?

* Walishe chakula chenye protein nyingi. Kwa kawaida chakula cha kuku wanaotaga huwa na protein 16%, kipindi cha kuku kunyonyoka manyoya ongeza protein ifike 20-25%.

* Hakikisha kuku wana chakula na maji muda wote.

* Hakikisha kuku hawasumbuliwi na kupata stress.  Mfano, epuka kuleta kuku mgeni bandani.

* Epuka kuwabeba au kuwashika kuku kipindi hiki, kwani itawaumiza na kuwaongezea stress.

* Hakikisha kuku anayeota manyoya hadonolewi na wenzake.

 

MUHIMU: Majogoo na mitetea yote hupitia unyonyokaji wa manyoya.

 

Imeandaliwa na

Aquinus Poultry Farm.

0655347932

Leave a Reply

error: Alert: Imezuiliwa !!